ABEMEYE GUCA BUGUFI YEZU ARABAZIMANIRA.

AMASOMO N'INYIGISHO YO KUWA KANE W'ICYUMWERU CYA V GISANZWE, UMWAKA A MBANGIKANE(KUWA 12/02/2026).

Abatagatifu: Ewulariya, Sosteni, Monaldi, Felisi, Benedigito wa Aniyani.

 

ISOMO RYA MBERE.

Isomo ryo mu gitabo cya mbere cy’Abami(1 Bami 11, 4-13).

 

4Salomoni amaze gusaza, abagore be bamuhinduye umutima bawerekeza ku zindi mana; maze umutima we ntiwakomeza kurangamira Uhoraho nk’uko uwa se Dawudi wari umeze. 5Salomoni ayoboka Ashitoreti, imanakazi y’ Abasidoni, na Milikomu, ishyano ry’Abahamoni. 6Salomoni akora ibyo Imana yanga, ntiyaba akiyobotse Uhoraho nk’uko se Dawudi yari yarabigize. 7Nuko Salomoni yubaka hejuru y’umusozi uteganye na Yeruzalemu, ahubaka urutambiro rugenewe Kemoshi, ishyano ry’Abamowabu, yubaka n’urundi rutambiro rugenewe Moleki, ishyano rv’Abahamoni. 8Abigenzereza atyo ibigirwamana by’abagore be b’abanyamahanga bose; batwikiraga imana zabo imibavu, bakazitura n’ibitambo. 9Uhoraho arakarira Salomoni, kuko yari yarayobeje umutima we awutanya n’Uhoraho, lmana ya Israheli, yari yaramubonekeye kabiri 10kandi ikamutegeka imwihanangiriza ko atazagira izindi mana yiyegurira, nyamara Salomoni ntiyumvira icyo Uhoraho yari yamutegetse. 11Uhoraho abwira Salomoni ati « Kubera ko wangenjeje utyo, ukaba utarakurikije  lsezerano ryanjye n’amategeko nari naguhaye, ngiye kukunyaga ubwami mbugabire umwe mu bagaragu bawe. 12Nyamara simbikora ukiriho kuko ngiriye so Dawudi, ahubwo nzabunyaga umwana wawe. 13Ariko kandi na we sinzamunyaga ubwami bwose, nzamusigira umuryango umwe kubera so Dawudi na Yeruzalemu nitoreye. »

Iryo ni Ijambo ry’Imana.

 

ZABURI

Zab 106(105), 3-4ab, 6.35, 36-37, 39-40.

 

Inyikirizo: Uhoraho, uratwibuke, wowe ugirira neza umuryango wawe.

 

Hahirwa abita ku mategeko y’Uhoraho

Igihe cyose bagakurikiza ubutabera!

Uhoraho, uranyibuke,

wowe ugirira neza umuryango wawe.

 

Koko twaracumuye nk’abasekuruza bacu,

twaragomye duteshuka inzira,

bivangavanze n’abanyamahanga,

maze biha gukurikiza imico yabo,

 

Bagaragiye ibigirwamana byabo,

maze bibagusha mu mutego;

abahungu babo n’abakobwa babo,

babaturaho ibitambo by’ibigirwamana!

 

Barihumanyije kubera ibyo bakora,

imigenzereze irabandarika;

nuko uburakari bw’Uhoraho bugurumanira umuryango we,

azinukwa abo yari yaragize abe.

 

IBANGO-NDIRIMBO RIBANZIRIZA IVANJILI(Yak 1, 21).

 

Alleluyu Alleluya.

Nitwakirane urugwiro ijambo ryatubibwemo:

ni ryo rishobora kudukiza.

Alleluya.

 

IVANJILI NTAGATIFU.

Amagambo yo mu Ivanjili Ntagatifu uko yanditswe na Mutagatifu Mariko(Mk 7, 24-30).

 

Muri icyo gihe, 24Yezu ajya mu gihugu cya Tiri. Nuko yinjira mu mu nzu adashaka ko hagira ubimenya, ariko ntiyashobora kuhaguma bitamenyekanye. 25Ako kanya, unugore wari ufite umwana w’umukobwa wahanzweho na roho mbi yumvise bamuvuga, araza amupfukama imbe. 26Uwo mugore yari umunyamahanga, kavukire k’i Fenisiya ho muri Siriya, nuko amusaba kwirukana iyo roho mbi yari mu mukobwa we. 27Yezu aramubwira ati « Reka abana babanze bahage, kuko bidakwiye gufata umugati w’abana ngo bawujugunyire ibibwana. » 28Umugore aramusubiza ati « Ni koko, Nyagasani! ariko n’ibibwana birya utuvungukira abana bataye mu nsi y’ameza. » 29Aramubwira rero ati «Ngiriye iryo jambo uvuze, ngaho genda, roho mbi ivuye mu mukobwa wawe.» 30Uwo mugore arataha, asanga umwana arambaraye ku buriri koko roho mbi yamuvuyemo.

 

Iyo ni Ivanjili Ntagatifu. 

 

*************

INYIGISHO

 

Yezu Kristu akuzwe !

 

Nyagasani Yezu Umukiza wacu aje adusanga mu ijambo rye, kugira ngo akomeze aridukirishe.

 

Uyu munsi Yezu aratwereka mu isomo rya mbere, uburyo icyaha kigira ingaruka; atari kuri nyiracyo gusa, ahubwo no ku bamukomokaho. 

 

Aratwereka kandi Nyagasani Yezu mu Ivanjili ko afite ububasha ku mashitani, ko akiza abantu bose baje bamusanga bamutakambira bicishije bugufi, ko Yezu adakeneye kugera ku wo agomba gukiza. Ububasha bwe ntibukeneye ko akora ku muntu, cyangwa se uwo muntu amukoraho. Afite ububasha bukomeye ku buryo tudashobora kubyumva. 

 

Abwira uwo mugore ati «Ngaho jyenda, roho mbi ivuye mu mukobwa wawe. » Yari yavuye kure aje kumusaba kumwirukanira roho mbi mu mukobwa we. Ijambo yamubwiye abwira uwo mugore, rikiza umwana we wari uri mu rugo, kubera ko uwo mugore yari yemeye Yezu, ko abishoboye, yamutitirije yamusabye.

 

Ariko nyamara uriya mugore na we, birumvikana nyine dukurikije imyumvire ya kiyahudi n’ibyo twavuze biturutse ku isomo rya mbere, biragaragara ko na we Nyagasani Yezu Kristu yashatse kubanza kumukiza; gusukura umutima we, kumukiza ubwirasi. Yashatse rwose ko abanza kwemera gucishwa bugufi, kugira ngo iyo roho mbi ive mu mukobwa we.

 

Uko rero Salomoni mu isomo rya mbere yabaye umuryango w’ibyago byinjiye bigatesha umuhungu we ingoma, na roho mbi yari iri muri uriya mukobwa, ifitanye isano nta gushidikanya n’ubuzima bw’uriya mugore. Ni yo mpamvu Yezu Kristu yahamukirije, ibyo we yari arwaye. Umugore koko aca bugufi, maze roho mbi ziva iwe, ziva mu rugo rwe. 

 

Ku byerekeranye rero n’amshitani, birazwi ko bimwe mu bintu biranga shitani nyine harimo ubwirasi. Kandi natwe akenshi ikatwinjiramo kubera ubwirasi bwacu. 

 

Urugero rw’ubwirasi ni nko kutiyakira, kutemera: kutemera uko uteye, kutemera uko Nyagasani Uhoraho yakuremye ugashaka nyine gusa uko udasa! Hari abagiye bitera ubumuga, bashaka kwihindura uko batari. Muri iki gihe ni indwara ikomeye abantu barwaye. Gushaka kwihindura uko utari, ni amarembo shitani yinjiriramo kandi igakora ibintu bibi mu muntu cyangwa se no mu be. 

 

Ibyo ari byo byose rero, Yezu yakijije uriya mugore, akiza n’umwana we. Ntabwo yabwiye uwo mugore ngo kubera ko watakambye cyane, cyangwa se kubera ko umwana wawe ababaye, arakize. Ati « Ngiririye iryo jambo uvuze… » Kuko umugore yari amushubije ati «Ni koko Nyagasani. Ariko n’ibibwana birya utuvungukira abana bataye munsi y’ameza. » Ubwo bwicishe bugufi bwanyuze umutima wa Yezu. Uwo mugore yemera kwigereranya n’akabwana imbere ya Yezu ! Yezu Kristu ahita amubwira ati « Kubera iryo jambo uvuze roho mbi ivuye mu mukobwa wawe » 

 

Ubwirasi rero bushobora gutuma roho mbi zinjira mu bana. Ubwirasi bw’ababyeyi bushobora gutuma roho mbi zinjira mu bana babo cyangwa se n’ibindi byaha byose. Ku buryo ibyo ngibyo nta muntu ugomba kubikinisha. 

 

Muri rusange, ibibazo by’abana biba bifitanye isano n’Ubuzima bw’ababyeyi. Ni yo mpamvu nta muntu uzi ubutumwa wenda bwo gusabira abantu uko buteye, ushobora kwemera kwakira umwana runaka ababyeyi be bakiriho, na we adashatse kuvugana na bo.

 

Ubundi nk’uko umukiro winjiraga mu muryango, ati « Kanaka yakira  Nyagasani Yezu n’urugo rwe, ni nk’uko na Sekibi na yo ikora ityo. Cyane cyane iyo inyuze ku babyeyi, iyo inyuze kuri nyir’urugo, kuri mama kuri papa, irinjira kandi ikinjira muri bose, iyo ari yo yose. Ariko byagera ku busambanyi bikaba akarusho.

 

Ni yo mpamvu rero ababyeyi bagomba kwitonda cyane. Cyane cyane ababyeyi biyita abakristu, bakumva ko ubuzima bwa roho z’abana babo bufitanye isano n’ibyaha byabo. 

 

Hari ababyeyi bamwe usanga barira bati “Abana baratunaniye.” Nyamara bakiyibagiza ko ubuzima bw’abo bana bufitanye isano n’ibyaha byabo. Aho kugira ngo bikomange ku gituza bemere kuba nk’akabwana imbere ya Yezu nk’uriya mugore, ugasanga ahubwo baracira urubanza Yezu bati” Kuki ibi biba? Ese ko dusenga, kuki abana bacu baba kuriya?” Ariko nyamara ubabajije uti ”Ariko se, mu buto bwanyu mwe mwari mumeze gute? Mwe mwari mumeze gute?”

 

Umuntu ugasanga ararira ngo umukobwa we yarijyanye cyangwa se yarishyingiye, cyangwa se umuhungu we. Wamubaza uti “Ariko se wowe, harya washyingiwe ryari? Yego natwe twamaze imyaka ibiri tubana nyine tudashyingiye, ariko twageze aho turashyingirwa!” None? Hanyuma se bo uragira ngo bigende gute? 

 

Ababyeyi bagomba kwitonda cyane. Cyane cyane no mu gushaka gukosora abana babo, cyangwa se kubabazwa n’ibyo abana babo barimo bakora, aho kubanza ngo basuzume, ibyaha byabo ubwabo.

 

Hariho n’abo usanga ari ababyeyi bubatse urugo, ariko mu gutegura umubano kwabo baragitsinzwe, barakoze ibyo Sekibi Sebusambanyi ishaka. Urwo rugo nyine muba muruhaye Fondation ya Sekibi. Ntibibatangaze rero ko Sekibi izagenda irwinjiramo, ubwo busambanyi bugakwira mu bana bose. Ibyo ngibyo ni ukuri! Ntugomba kuvuga ngo “None se abana banjye bite?” Ni wowe nyine wabahaye Fondation. 

 

Aho kugira ngo rero uwo mubyeyi yikomange ku gatuza imbere ya Yezu avuga ati “Nyagasani Yezu twaracumuye, biriya twebwe kuki twabikoze! abana bacu twabashakiye umuvumo!” Akenshi ndetse bamwe ntibigera banabishakira Penensiya bavuga ngo” None se ntiyari fiyanse (fiancé) wanjye!” Wari wamuhawe na nde, ko umuntu w’umukristu wasizwe amavuta ku gahanga bavuga bati “Uri umusaserdoti, uri umuhanuzi n’umwami” nta we ukora ku mubiri we Yezu atamumuhaye mu gushyingirwa, kandi igihe cyose abikoze ko bigira ingaruka?

 

Nyagasani Yezu rero akiza abantu biyemeje kwicisha bugufi, bemera ibyaha byabo imbere Ye. Bakareka kwirata ngo ese “Ibi ngibi bitubaho biraturuka he?” Kandi ari bo rembo nyir’izina ry’ibyo ngibyo, byose. Ariko batabizi wenda! Ubu noneho niba utari ubizi urabimenye.

 

Ngaho rero uzegere Yezu umusabe imbabazi z’ibyaha wakoze, wiyunge na We aho guhora uvuga uti”Ibi kuki biri mu kumbaho? Jyewe nakoze iki, ko mbona nsenga, kuki abana banjye banga bakananira?” Nawe wari warananiranye, ubyibuke. Yezu wari waramunaniye. None rero aho umugarukiye, urumva hari ibyo wari warabibye.

 

Nyagasani Yezu ni Nyirimpuhwe abamusanze bose basaba imbabazi bicishije bugufi nk’uyu mugore, ntabasubiza inyuma. 

 

Isengesho ry’Uwemera Yezu Kristu, igihe cyose riba riciye bugufi. Ntabwo umuntu agenda atunga Yezu urutoki; kuko Yezu nta cyaha agira, nta cyo yakoze nta cyo azakora, nta n’icyo akora. Ahubwo akwiye gupfukamirwa no gutakambirwa, gushengererwa no gusingizwa. 

 

Uriya mugore rero yabikoze neza, yicisha bugufi imbere ya Yezu, Yezu amugirira impuhwe. Roho Mutagatifu naduhe iyo ngabire yo kwicisha bugufi imbere ya Yezu mu masengesho yacu, twemera ko nta cyo turi cyo, turi utwo tubwana ku meza ya Yezu Kristu Nyagasani. Tukaba dukeneye nibura ko utwo tuvungukira twamanuka, kugira ngo dushobore kugira ubuzima buturutse ku meza matagatifu.

 

Nyagasani Yezu natwigishe kwicisha bugufi mu misengere yacu kubw’amasengesho ya Bikira Mariya n’Abatagatifu bose, no ku bubasha bwa Roho We Mutagatifu.

 

Ngwino Roho Mutagatifu.

Mutima utagira inenge wa Bikira Mariya, uturengere uturwaneho mu izina rya Yezu.

Bikira Mariya Mwamikazi wa Karumeli, udusabire.

Singizwa Yezu Kristu wadupfiriye ukazaka!

 

Yezu ndakwizera.

 

Padre JEREMIE HABYARIMANA