YEZU NADUTSINDIRE ICYAHA N'URUPFU

*AMASOMO N'INYIGISHO YO KUWA KABIRI W'ICYUMWERU CYA VI GISANZWE, UMWAKA A MBANGIKANE(KUWA 17/02/2026).*

*Abatagatifu: Abakurambere 7 b'umuryango w'abagaragu ba Mariya. Alikisi, Romuli na bagenzi be bahowe Imana muri Venesiya, Fransisko Rejisi Kreti.*

 

*ISOMO RYA MBERE.*

 

*Isomo ryo mu ibaruwa ya Mutagatifu Yakobo Intumwa(Yak 1, 12-18).*

 

Bavandimwe, 12hahirwa umuntu uba intwari mu bigeragezo, kuko namara kugeragezwa azahabwa ikamba ry'ubugingo, lmana yasezeranyije abayikunda. 13Nihagira ugwa mu gishuko ntakavuge ati« Ni Imana inshuka », kuko Imana idashobora koshya gukora ikibi cyangwa ngo igire uwo ishuka. 14Buri muntu ashukwa n'irari rye bwite rimukurura, maze rikamwoshya. 15Iyo iryo rari rimaze gusama ribyara icyaha, n'icyaha cyamara gukura kikabyara urupfu. 16Ntimukibeshye rero, bavandimwe nkunda. 17Icyitwa ingabire y'agaciro cyose, n'ituro rishyitse iryo ari ryo ryose, bikomoka mu ijuru; ku Mubyeyi w'urumuri, we udahinduka kandi ntatume habaho umwijima uturutse ku mihindagurike y'ibihe. 18Ni ku bwende bwe bwite yatwibyariye akoresheje ijambo rye ry'amanyakuri, kugira ngo tube imena mu biremwa bye.

 

Iryo ni Ijambo ry’Imana. 

 

*ZABURI*

*Zab 94(93), 12-13, 14-15, 18-19.*

 

*Inyikirizo: Uhoraho, hahirwa umuntu wowe ukosora.*

 

Uhoraho, hahirwa umuntu wowe ukosora,

maze ukamwigishisha amategeko yawe,

kugira ngo ahorane ituze mu minsi y'amakuba,

igihe umugiranabi acukurirwa imva.

 

Kuko Uhoraho adatererana umuryango we,

akaba atareka umurage we;

ubucamanza buzakurikiza ubutabera,

ab'umutima ugororotse bose bazabuyoboke.

 

Iyo mvuze nti« Nta ho mpagaze!»,

ubuntu bwawe Uhoraho, burandamira;

igihe impagarara zinyuzuye umutima,

ubuhumurize bwawe burampimbaza.

 

*IBANGO-NDIRIMBO RIBANZIRIZA IVANJILI: Zab 78(77), 24.*

 

Alleluya Alleluya.

Uhoraho yagaburiye umuryango we mu butayu

abahaza umugati wo mu ijuru.

Alleluya.

 

*IVANJILI NTAGATIFU.*

 

*Amagambo yo mu Ivanjili Ntagatifu uko yanditswe na Mutagatifu Mariko(Mk 8, 14-21).*

 

Muri icyo gihe, 14abigishwa bari bibagiwe kujyana imigati, maze bakagira umugati umwe gusa mu bwato. 15Nuko Yezu arabihanangiriza ati «Murabe maso kandi mwirinde umusemburo w'Abafarizayi n'umusemburo wa Herodi.» 16Bo rero batangira kujya impaka ngo nta migati bafite. 17Yezu abimenye, arababwira ati «Kuki mujya impaka ngo nta migati mufite? Ntimurumva kandi ntimurasobanukirwa? Mbese umutima wanyu uracyanangiye? 18Mufite amaso ntimubone, mukagira n'amatwi ntimwumve? Kandi ntimwibuka, 19igihe manyuriye imigati itanu abantu ibihumbi bitanu, mwahakuye inkangara zingahe zuzuye ibisate? Baramusubiza bati «Ni cumi n'ebyiri. » 20Arongera ati «N'igihe manyuriye imigati irindwi abantu ibihumbi bine, mwahakuye inkangara zingahe zuzuye ibisate?» Baramusubiza bati: «Ni indwi.» 21Nuko arababwira ati «Na n'ubu ntimurasobanukirwa?»

 

Iyo ni Ivanjili Ntagatifu.

 

***************************************

*INYIGISHO*

Nyagasani Yezu Byishomo  byacu aje adusanga mu ijambo rye, kugira ngo akomeze aridutagatifurishe. 

 

Mu isomo rya mbere, Nyagasani Yezu aratwibutsa ko icyaha ari twebwe ubwacu giturukamo, tukagisama, tukakibyara, kandi kikaduhitana.

 

Nta we rero ugomba gushinja abandi ibyaha bye. Buri wese agomba gukomanga agatuza ke. Ariko cyane cyene icyo Nyagasani Yezu abikoreye ni ukugira ngo duhinduke; twumve ko umwanzi wacu wa mbere ari cyaha. Bityo tureke kwitwaza ibyaha turwanya abo twita abanzi, mu gihe umwanzi nyawe utuzaniye urupfu nyarwo yitwa icyaha. 

 

Hahirwa rero ababyumva. Aho kugira ngo umuntu abeho ashinja abandi, ndetse agatinyuka no gushinja Imana ihoraho, ko ari Yo yakuruye amatongo ari mu mutima we. 

 

Ntabwo rero bishoboka. Uwakuremye ntabwo yanahindukira ngo abe ari we uza kuguhitana. Yakuremye kugira ngo wishime ugire amahoro. Ahubwo umwanzi ugutandukanya na We ng’uwo umwanzi nyawe, kandi si we ubikora. 

 

Data Uhoraho yaduhaye Yezu. Umwana we w’ikinege, we waduhaye Roho We, yahindukira ate atwoherereza roho mbi, kugira ngo zirimbure roho zacu? Uwemeye gutanga Umwana we w’ikinege, kugira ngo abe impongano y’ibyaha byacu, yahindukira se ate kandi ngo abibe ibyaha mu mubiri wacu, mu buzima bwacu? Ntibishoboka. Ni yo mpamvu nyine twumvise amagambo yeruye. Ati” Nihagira ugwa mu gishuko ntakavuge ati« Ni Imana inshuka », kuko Imana idashobora koshya gukora ikibi cyangwa ngo igire uwo ishuka. Buri muntu ashukwa n'irari rye bwite rimukurura, maze rikamwoshya. Iyo iryo rari rimaze gusama ribyara icyaha, n'icyaha cyamara gukura kikabyara urupfu.”

 

Ngibyo ibyo Nyagasani Yezu rero uyu munsi ashaka kuturinda. Sekibi ntikatubeshye ikoresheje twebwe ubwacu, ikoresheje ibitekerezo byacu n’imyumvire yacu igandiyemo umwijima. Ni yo mpamvu iryo jambo ryongera ritubwira riti “Ntimukibeshye rero.”

Ntimukibeshye! Nyagasani Yezu yazanywe no gutsemba icyaha mu bantu. Ntashobora rero noneho kuba icyitso cy’icyaha muri twe. Ni twebwe ubwacu: ni icyaha cyacu, ni icyaha cyacu gikabije: “Ni icyaha cyanjye, ni icyaha cyanjye gikabije. Kuko nacumuye rwose, kuko nacumuye rwose.”

 Nta wundi ugomba gutunga urutoki mu cyaha wowe ubwawe wikoreye. Umuntu ntajya muri Penetensiya agiye kwicuza ibyaha by’abandi, ni ibye bwite ajyanayo. Abandi na bo baba bazicuza ibyabo, igihe bashaka gucungurwa. Niba batabishaka kandi ibyo birabareba. Ariko  wowe icuze ibyaha byawe. Wivuga ko bagututse ukarakara, vuga ko warakaye; mbere na mbere ndetse n’impamvu si ngombwa kuzishyiraho. Mbere na mbere uburakari ni ubwawe, kandi ubwo burakari ni cyo cyaha cyawe.  Kuba waratutswe si icyaha cyawe, ni icyaha cyabo, na bo bazakicuza.

Nyagasani Yezu kandi aratwibutsa ko usibye ibyo byacu bibi, hari ibyiza noneho duhabwa cyangwa se n’abandi bahabwa, nk’intwaro zo kudutabara ngo tudatabikwa n’ubukozi bw’ibibi bwacu. Ingabire y’agaciro:” Ikitwa ingabire y’agaciro cyose. N’ituro rishyitse iryo ari ryo ryose rikomoka mu ijuru, ku Mubyeyi w’urumuri. We udahinduka kandi ntatume habaho umwijima. 

Hariho igihe umuntu ashobora kwibwira ko ibyiza akora, ibimurimo byiza ari we biturukaho ko ari umuntu w’agatangaza, akaba yakwirata mu bitari ibye. Twibuke ko nk’uko Mutagatifu Pawulo intumwa abitwibutsa, mu ibararuwa ya mbere y’Abanyakorinti (1Kor 4,7)  ati”Ni iki ufite utahawe? Ikiza cyose kikurimo koko cy’agaciro ni ingabire wahawe. Ni yo mpamvu wagombye guhora ushimira  Data na Mwana na Roho Mutagatifu, aho kwirata wowe ubwawe. Cyangwa se niba hari abandi bafite ibyo byiza, aho kugira ngo ubagirire ishyari, ugasingiza Data na Mwana na Roho Mutagatifu, wabahaye ibyo byiza, bityo bikakurinda ishyari rishobora kukubyarira urupfu rwawe bwite, n’urw’abandi. 

Nyagasani Yezu mu Ivanjili, arasaba abe kwirinda uburyarya bw’Abafarizayi n’Aba Herodi, agerageza kubasobanurira kugira ngo amaso yabo afunguke. Bumve ko atari Yezu bamwe bita mwene Mariya na Yozefu, uri aho ngaho, ahubwo ari Uhoraho Nyir’izina. Wa wundi wagaburiye umuryango we mu butayu. Ayo maso rero, ni amaso y’ukwemera abo kwa Herodi n’Abafarizayi, batari bakagira, ahubwo imyitwarire yabo ikarangwa n’uburyarya gusa. Bakaza bakurikiye Yezu, bataje kumutega amatwi, ahubwo baje kumutega imitego, ngo bamuhitane. 

Dushobora rero natwe gutyara mu gukurikira Yezu Kristu, cyangwa muri Kiliziya ye, ariko umuntu adashaka guhinduka habe na gato ngo yemere ko Yezu Kristu ari umwami koko n’Umugenga w’urupfu n’ubugingo. Ahubwo ashakamo inyungu ze bwite. Agira ngo abantu bamurebe neza muri Kiliziya, cyangwa bahamwubahire: ahashaka ibyubahiro bye. Cyangwa n’izindi nyungu zose z’amanjwe. Umuntu akahaba mu by’ukuri asa n’ushaka Yezu. Ariko ibya Yezu nta cyo bimubwiye, bitamufasheho na busa. Ibyo biteye agahinda kandi Yezu abidutsindire. 

Ngwino Roho Mutagatifu.

Mutima utagira inenge wa Bikira Mariya uturengere uturwaneho mu izina rya Yezu.

Bikira Mariya Mwamikazi wa Karumeli, udusabire.

Singizwa Yezu Kristu wadupfiriye ukazuka!

Yezu ndakwizera.    

Padre JEREMIE HABYARIMANA