YEZU NI UMWAMI W’UBWIYUNGE.*

*AMASOMO N'INYIGISHO YO KUWA GATANU W'ICYUMWERU CYA MBERE CY'IGISIBO, UMWAKA A MBANGIKANE(KUWA 27/02/2026).*

*Abatagatifu: Gabriyeli(Adolata) cyangwa Uw'ububabare, Ana Rine hamwe na bagenzi 40 bahowe Imana mu Bwongereza, Honorina, Leyandiri.*

*ISOMO RYA MBERE.*

*Isomo ryo mu gitabo cy’Umuhanuzi Ezekiyeli(Ezk 18, 21-28).*

Uhoraho avuze atya: 21«Umugiranabi naramuka yanze ibyaha byose yakoze, akubahiriza amategeko yanjye, agakora ibitunganye kandi agakurikiza ubutabera, azabaho nta bwo azapfa. 22Ibicumuro bye ntibizibukwa ukundi; azabaho abikesheje ko yakurikije ubutabera. 23Mbese nakwishimira nte urupfu rw’umunyabyaha, uwo ni Nyagasani Uhoraho ubivuze, ahubwo nakwishimiye ko yahinduye imyifatire ye maze akabaho? 24Ariko se niba uwari intungane aretse ubutungane bwe, agakora icyaha akurikiza amahano yose umugiranabi akora, ubwo se murabona yazabaho? Ntibazibuka ukundi ko yakurikizaga ubutabera, ahubwo kubera ubuhemu bwe n’ibyaha yakoze, azapfa.

25Muravuga kandi muti “Imigenzereze ya Nyagasani ntitunganye.” Tega amatwi rero, muryango wa lsraheli: mbese koko imigenzereze yanjye yaba ari yo idatunganye? Cyangwa se imigenzereze yanyu ni yo idatunganye? 26Niba uwari intungane aramutse aretse ubutungane bwe agacumura maze agapfa, azaba azize ibyaha yakoze. 27Ariko niba umunyabyaha yanze ibyaha yakoraga, kugira ngo akore ibitunganye kandi akurikize ubutabera, aba arengeye ubugingo bwe. 28Niba yanze ibicumuro bye byose, nta bwo azapfa, ahubwo azabaho. »

Iryo ni Ijambo ry’Imana.

*ZABURI*

*Zab 130(129), 1-2, 3-4, 5-6ab, 7bc-8.*

*Inyikirizo: Uhoraho, uramutse witaye ku byaha byacu, Nyagasani, ni nde warokoka?*

Uhoraho, ndagutakambira ngeze kure,

Uhoraho, umva ijwi ryanjye.

Utege amatwi ijwi ry’amaganya yanjye!

Uhoraho, uramutse witaye ku byaha byacu,

Nyagasani, ni nde warokoka?

Ariko rero usanganywe imbabazi,

kugira ngo baguhoranire icyubahiro.

 

Nizeye Uhoraho n’umutima wanjye wose,

nizeye ijambo rye.

Umutima wanjye urarikiye Uhoraho,

kurusha uko umuraririzi ategereza umuseke.

 

Kuko Uhoraho ahorana imbabazi,

akagira ubuntu butagira urugero.

Ni We uzakiza Israheli ibicumuro byayo byose.

*IBANGONDIRIMBO RIBANZIRIZA IVANJILI(Ezk 33, 11).*

Amagambo yawe Nyagasani, aturuka kuri Roho kandi agatanga ubugingo.

Ntiwishimira urupfu rw’umugome, ahubwo wishimira ko yahinduka akazibukira imyifatire ye mibi, kugira ngo abone kubaho.

Amagambo yawe Nyagasani, aturuka kuri Roho kandi agatanga ubugingo.

 

*IVANJlLI NTAGATIFU.*

*Amagambo yo mu Ivanjili Ntagatifu uko yanditswe na Mutagatifu Matayo(Mt 5, 20-26).*

Muri icyo gihe, abigishwa bari bateraniye iruhande rwa Yezu ku musozi, maze arababwira ati 20«Reka mbabwire: niba ubutungane bwanyu budasumba ubw’abigishamategeko n’Abafarizayi, nta bwo muzinjira mu Ngoma y’ijuru. 21Mwumvise ko abakurambere babwiwe ngo ‘Ntuzice’, kandi nihagira uwica, azabibarizwa mu rubanza. 22Jyewe mbabwiye ko umuntu wese urakariye uwo bava inda imwe, azabibarizwa mu rukiko; naho nabwira uwo bava inda imwe ati ‘Gicucu!’, azabibarizwa mu Nama Nkuru; namubwira ati ‘Uri umusazi!’, azishyurira mu nyenga y’umuriro. 23Nuko rero nujyana ituro ryawe imbere y’urutambiro, ukahibukira ko uwo muva inda imwe mufitanye akantu, 24rekera ituro ryawe imbere y’urutambiro, ubanze ujye kwigorora n’uwo muva inda imwe; hanyuma ugaruke ubone guhereza ituro ryawe. 25Jya ugira ubwira bwo kwiyunga n’uwo mwangana, igihe mukiri kumwe mu nzira kuglra ngo ataguteza umucamanza, umucamanza akagushyikiriza umupolisi, ubwo ukaba uroshywe mu buroko. 26Mbikubwize ukuri: nta bwo uzavamo utishyuye byose, kugeza ku giceri cya nyuma.» 

Iyo ni Ivanjili Ntagatifu.

************************************

*INYIGISHO*

Yezu Kristu akuzwe!

Kuri uyu munsi rero, Nyagasani Yezu Kristu adusanze mu ijambo rye kugira ngo atujijure, atuyobore inzira ya Pasika. Ibyishimo byo gukizwa na We urupfu n’icyaha no kuzabana na We ubuzira herezo.

Yezu Kristu rero araduhugura kugira ngo ibintu byose dushobora guhagamamo, cyangwa bishobora kumudukingiriza, cyangwa kudutandukanya na We, muri iki gisibo tubisibe, tubisige, tumusange, tumusingize. Singizwa Yezu Kristu wapfuye ukazuka! 

Mu isomo rya mbere rero Yezu araduhumuriza, gusa twumve neza kandi tumugirire icyizere. Nk’uko na Zaburi yabyibukije “Ese Uhoraho witaye kubicumuro byacu harokoka nde?” Nta we. Ariko rero impuhwe ze ni igisagirane. Icyo asaba ni kimwe. Uriya muhanuzi arabyibutsa no mu Ibyakozwe n’Intumwa, guhera ku munsi wa Pentekisiti, intumwa zazamuye amajwi zibyamamaza. Umuntu wese wemeye Yezu Kristu, akareka Roho we akamuyobora, atangira ubuzima bushya abaho. Ibyahise byose birarangira, agatangira ubuzima bushya, akavuka bundi bushya, akabaho bundi bushya.

Muvandimwe rero, Yezu Kristu ntazahwema kuguhumuriza ibyo waba warakoze byose. Kabone n’aho byaba ari ukwikora mu nda inshuro nyinshi. Uwumva ikinyarwanda arumva ibyo ari byo, cyangwa se gukora andi mahano arenze. Ya yandi twigeze kuvuga ko atagira izina cyangwa se atajya avugwa! akaba n’ikinyarwanda nta jambo ryigeze riyaha kuko ari akataraboneka mu Rwanda (niba umuntu yavuga atyo) cyangwa se ari akatazwi mu Rwanda, ariko wowe ukaba uzi ko ibyo bintu ari ibyawe, ko ubana na byo, cyangwa wabibayemo. Ibyo byose rero bishobora kukubera inzitizi igihe utumva ko Nyagasani impuhwe ze zirenze ibibi byose wakora. Yezu Kristu ni Umunyampuhwe. Ntabo yameneye amaraso ye ubusa. Se wamuduhaye ni Umunyampuhwe. Ntiyarekuye Umwana we kugira ngo aturimbure. Ntabwo yaje kutwihoraho, yaje kutubeshaho atubabarira. Roho Mutagatifu ni Roho w’impuhwe utumanukiraho, akaduha umutima wicuza, maze ibyo bicumuro tukabicurangura tugacurangira uwaducunguye! Singizwa Yezu Kristu wadupfiriye ukazuka! 

Iyo ntambwe rero yo kuvuga ati “Ndavutse mvuye aha hantu”, n’ubwo navuga nti ni ingabire, ariko iyo ngabire nyine umuntu ashobora kwanga kuyakira. Nk’uko umuntu yagutekera ibiryo akakugaburira, wowe ukanga kurya! Ese niwicwa n’inzara, ikosa rizaba ari irye? Ubwo se uzavuga koko, ko kurya ari umurimo wakunaniye igihe utarwaye? Natwe rero, icyo Yezu adusaba ni ukwakira izo mpuhwe ze, tukemera kubabarira no kubeshwaho na zo. Kuyoborwa na zo kuva icyo gihe. Turabyibutswa. Muby’ukuri izo mpuhwe zirarenze ku buryo mu rwego rw’Isezerano Rishya birenze ibyo umuhanuzi Ezekiyeli we avuga. Umuntu ashobora kuba yanze ibyo byaha, yemeye Yezu Kristu ko ari We wabihongereye, ko amaraso ye ari yo yabimuvaniyeho, ko ari We buzima bwe, ibyo birahagije kugira ngo aronke ubugingo bw’iteka nk’uko nyine cya gisambo cyo ku musaraba byagenze. ”Mukanya uraba uri kumwe nange muri Paradizo”. Izo mpuhwe ni (…)! kuba nta cyo wakoze gusa wamwemeye byonyine, ibyo bishobora kubaho. Kabone kandi n’aho wagira ibyo ukora nk’uko twigeze kujya tubizirikanaho, si ibyo bikorwa byawe bigukiza, ahubwo ni Yezu Kristu ubiha agaciro. Ni Yezu Kristu ubiha agaciro. Mu maraso ya Yezu Kristu ni ho bihererwa agaciro. Mu izina rya Yezu ni ho bihererwa agaciro. Ni yo mpamvu igihe cyose ibyo dukora byose, nk’uko Pawulo abitwigisha, abitwibutsa mu (Abanyakolosi 3, 17) tugomba kubitsindagiramo izina rya Yezu. “Ndakubabariye mu izina rya Yezu”.  “Ngusabye imbabazi muvandimwe, mu izina rya Yezu.” Izina rya Yezu! “Ibi ngibi mbigukoreye kubera urukundo mfitiye Yezu.” 

Mu izina rya Yezu! Nkumva ko igikubisweho ikashe ya Yezu Kristu, icyerekezo cyabyo nta handi usibye ku meza ya Data Uhoraho! kandi imbaraga zose za Roho Mutagatifu zikabyinjiramo zikabiyobora, nka Roho wa Yezu Kristu. 

Muri urwo rwego rero rw’uko Yezu Kristu atubabarira, atuyobora mu nzira yo kwiyunga n’abandi. Itegeko rye yaduhaye yaravuze ati” Mbahaye itegeko rishya. Ni mukundane, kandi mukundane nk’uko nabakunze. Icyo bose bazamenyeraho ko muri abigishwa bange, ni urukundo muzaba mufitanye.” (Yh13, 34-35)  

Urukundo muzaba mufitanye! Ubuvandimwe rero Yezu Kristu yabuhaye umwanya muri Kiliziya ye. Yashinze umuryango mushya w’abantu bakundana, kandi bagakundana urukundo rwe (atari rwa rundi rwa Sekibi Sebusambanyi ruri ku karimi ka benshi no mu nyungu zabo babeshya abantu, kubera ko na bo babeshywe! bayobya abantu, kuko na bo bayobye!). Ukunda abantu, ni Yezu Kristu We ubaha ubuzima buhoraho. Ikintu rero cyose kigutandukanya n’ubwo buzima, ni cyo kintu kibi ushobora guhura na cyo. Umuntu wese ugutandukanya n’inzira ya Yezu Kristu, uwo ni we mwanzi wawe nyawe. Kabone n’aho mwaba mukorana ibyo umubiri wanyu ushaka. Uwo ni we mwanzi wawe nyawe.

Yezu Kristu rero asaba abe gukundana urukundo nyarwo. Ku buryo umuntu areba undi, areba mugenzi we, akamubonamo ishusho ye, kandi ashaka kumuyobora mu kurushaho kunga ubumwe na Yezu Kristu, Ibyo ngibyo. Ibyo rero, kugira ngo amuherekeze muri urwo rugendo cyangwa se amufashe, ni ukumwihanganira mu byo yaba yamukoshejeho, mu mafuti yaba yamugiriye cyangwa se mu byaha, cyangwa se no mu bugiranabi yaba yagize. Ni yo mpamvu Yezu Kristu ahamagarira abe inzira y’urukundo rubahuriza mu bumwe nyabwo. Nk’uko nyine tuvuga Urusange rw’Abatagatifu. Abo bose bakunze Yezu Kristu, maze urwo rukundo rwa Yezu Kristu rukabahuza,  ku buryo umwe areba undi akamubonamo umuvandimwe. Byonyine no kuba bari kumwe bikabashimisha. “Yooo! dore wa wundi ukunda Yezu weee!” kikaba ari (…) ibyishimo bikuzura umutima we kuko abonye uwo muntu!

Ibyo rero bikaba biduhamagarira bavandimwe, kwirinda ikintu cyose gitandukanya abantu. Yezu ntazahwema kubivuga. Yezu Kristu ahuriza abantu mu bumwe. Roho mbi ziryanya abantu, (kandi ntizijya zibura) zihereye ku mafranga, zihereye ku mafuti, zihereye ku mafunguro cyangwa se ku mafu (ifu), cyangwa se ku mafu, ibintu byose bya hano kw’isi nyine bishobora guteranya abantu. Ugasanga abantu rwose bararebana ay’ingwe ku bintu by’amafuti!  Ohhh, Yezu tugirire impuhwe, uhuze abantu bose bafitanye inzika, inzigo hagati yabo. Amaraso yawe nk’uko yasenye izo nzigo, mu gikorwa rusange cyo gukiza abantu, na bo ni bakire iyo ngabire wahaye buri wese, maze inzigo zive hagati y’amoko, zive hagati y’ibihugu, zive hagati y’imiryango, zive hagati y’abavandimwe, bamwe baba basangiye n’umubyeyi ariko batajya basangira urukundo hagati yabo, basangira izina ryawe, ibyishimo byo gukizwa na We. 

Igihe cyose rero umuntu akoresheje cyane cyane ibikorwa bye cyangwa amagambo yagiye ateranya abantu, ajye amenya ko yakoze ubutumwa bwa Sekibi mu bantu. Kandi abantu rero biroroshye kubateranya. Kuko nyine uba ubasunikiye aho bahengamiye, kubahuza bikagorana, kubera ko ari nzira nyine y’umukiro. Urugamba rwo kurokora roho yawe muri Kristu.

Hari inama nakugira kugira ngo ushobore kwirinda ibintu biguteranya n’abantu:

-Irinde kugira umuntu uvuga nabi umubwira abandi bantu. Ahubwo ujye umubwira Yezu, umusabire. Kabone n’aho yaba akora ibibi. 

-Irinde kumenyesha amafuti y’abandi cyangwa se ibyaha byabo, abandi bantu.

-Fata ururimi rwawe, ahubwo ubiture Yezu Kristu cyangwa se nibiba ngombwa we ubwe ugende umurebe umubwire mu izina rya Yezu umuhane. Ku mugani wa Yezu Kristu nakumva uzaba ukijije umuvandimwe. Kuko igihe cyose Sekibi cyanecyane ihera ku magambo igateranya abantu. Amagambo abantu bavuga ku bandi. Iyo usohoye ijambo uvuga undi nabi, Sekibi iriheraho cyane igasenya nyine (…) uba uyihaye nyine intwaro yo kugusenya wowe ubwawe no gusenya uwo nguwo, no gusenya abandi benshi “Uhoraho, witaye ku byaha byacu se ni nde warokoka koko?” Hari utaracumuye atyo se n’ururimi rwe?

Ni igihe rero bavandimwe cyo kugira ngo duhinduke. Tuvuge ibyo tugomba kuvuga bikiza roho zacu, bigakiza n’abandi bantu. Ako karimi gahora kumva ko abandi bantu ari bo b’anyabyaha, kavuga ibyabo, kavuga ibyabo, kavuga ibyabo; byaba byiza umuntu agiye avuga ibye, kuko na we urabifite. Aho kujya kuririmba iby’abandi, ujye ujya muri Penetensiya uririmbe ibyawe. Cyangwa se, uwo muntu ugende umurebe uti « Biriya si byo mu izina rya Yezu. Oya. » Ukore ubutumwa nyine bwa gihanuzi, aho kugira ngo uhore uvugira hirya ubwira abandi bantu. Niba kandi hari umuntu dufitanye ikibazo nk’uko Yezu Kristu abivuga, ni byiza kwiyunga na we inzira zikigendwa. Ni muri ubu buzima.

Kubabarira no gusaba imbabazi. Iki gisibo ni igihe cy’urugendo cyo gukora ubwo butumwa.  « Mu izina rya Yezu ndakubabariye. Mu izina rya Yezu ndamubabariye. Nyagasani Yezu, abampemukiye bose mu izina ryawe ndababariye. Kandi abo uzashobora kungezaho bose nahemukiye, nzabasaba imbabazi mu izina ryawe, ndetse n’ubu ndabikoze imbere yawe, cyangwa se mu izina ryawe. Yezu, abo nahemukiye bose ku buryo bunyuranye, mbasabye imbabazi imbere yawe mu izina ryawe Yezu.» Ariko se niba usabye imbabazi, noneho nyine hinduka. Hinduka ureke kongera gukomeza kubahirika, ubahirikisha ururimi.

Umubyeyi Bikira Mariya adufashe bavandimwe, dushobore kumva mu by’ukuri Yezu Kristu ubumwe buduhuza, ari bwo buhamya nyabwo bw’ingoma ye. Ntitukibeshye. Byose byose ibyo dukora muri ubu buzima, twaba dusenga, twaba tugira gute, twaba tugira gute, ni ukugira ngo tugire ubuvandimwe. Urusange rw’Abatagatifu. Ariko atari ubuvandimwe bwa bundi ubwacu twitekerereje! Bumwe bugendera ku mategeko yacu, amategeko y’abantu nyine avuga ati « Umuntu udasangira n’abandi akayoga ubwo se (…)! » Amategeko ya kivandimwe nyine ko umuntu agomba kugurira abandi inzoga, na we agasangira inzoga na bo, ubwo ni ubuvandimwe buhemberwa n’abantu.

 Ubuvandimwe nyabwo: kurwanira umukiro wa roho z’abantu. Ubuvandimwe nyabwo buva mu mutima wa Yezu Kristu! Umuntu wese wifitemwo ivangura, iryo ari ryo ryose, icyo ryaba rishingiyeho cyose, ajye amenya ko sekibi aba yayihaye icumbi mu mutima we. Ese urinda kwanga umuntu Nyagasani Yezu yaremye akanamucungura, wowe avuze ati « Ndakwanze nange nk’uko unyangira abange, » wajya hehe? Uri iki mu by’ukuri kugira ngo wange umuntu Nyagasani yiremeye, amukunda ku buryo yanamumeneye amaraso ye!

Bavandimwe, Roho w’urukundo natumanukireho. Mbere na mbere atwereke uburyo Nyagasani yatubabariye. Twoye gushengurwa n’amateka yacu yahise, ahubwo tuyahereho tumusingiza, tumutura ubuzima buzaza, tumushimira impuhwe yatugiriye, twishyira mu rukundo rwe, tumwemerera gukunda abantu bose nk’uko na We adukunda kandi atazahwema kudukunda.

 

Singizwa Yezu Kristu wadupfiriye ukazuka!

Ngwino Roho Mutagatifu.

 Mubyeyi Bikira Mariya udusabire.

Padre JEREMIE HABYARIMANA