YEZU KRISTU NI INZIRA Y’UBUGINGO BWACU

*AMASOMO N'INYIGISHO YO KUWA GATANDATU UKURIKIRA UWA GATATU W'IVU, UMWAKA A MBANGIKANE(KUWA 21/02/2026).*

*Abatagatifu: Petero Damiyani, Pepini, Roberti.*

*ISOMO RYA MBERE.*

*Isomo ryo mu gitabo cy’Umuhanuzi Izayi(Iz 58, 9b-14).*

Niba iwawe uhaciye akarengane n’amagambo mabi, ugaharira umushonji igaburo ryawe bwite, kandi ugahembura uwazahaye, urumuri rwawe ruzarasira mu mwijima, ijoro ry’urwijiji rihinduke amanywa y’ihangu. Uhoraho azakuyobora ubudahwema, azaguhaze mu gihe cy’amapfa, amagufa yawe ayakomeze. Uzamera nk’ubusitani buvomererwa, cyangwa se nk’isoko idudubiza kandi ikagira amazi adakama. Uzubaka bundi bushya amatongo ya kera, usubukure imishinga yari iriho mbere, bazakwite «Umuzibabyuho, usibura amayira ngo abe nyabagendwa.» Niwirinda kwica isabato, no guharanira inyungu zawe ku munsi wanjye mutagatifu, ukita isabato «Umunsi w’umunezero», umunsi mutagatifu w’Uhoraho ukakubera «Umunsi w’icyubahiro», ukawubaha wirinda kugira umurimo ukora, wirinda guharanira inyungu zawe, cyangwa guhihibikana mu bucuruzi bw’urudaca, ni ho uzagira umunezero muri Uhoraho, maze nzakujyane mu igare, hejuru y’imisozi y’isi, ngutungishe umunani wa Yakobo, umukurambere wawe. Ni byo rwose, uwo ni Uhoraho ubivuze.

Iryo ni Ijambo ry’Imana.

*ZABURI*

*Zab 86(85), 1-2. 3-4. 5-6.*

*Inyikirizo: Uhoraho nyereka inzira yawe maze nkurikire ukuri kwawe.*

Uhoraho, tega amatwi, unsubize,

kuko ndi umunyabyago w’umukene.

Undwaneho kuko nakuyobotse,

wowe Mana yanjye, ukize umugaragu wawe ukwiringiye.

Nyagasani, ngirira imbabazi,

ni wowe ntakira umunsi wose.

Shimisha umutima w’umugaragu wawe,

kuko ari wowe ndangamiye, Nyagasani.

Nyagasani, wowe ugwa neza kandi ukagira ibambe,

wowe ugirira impuhwe zihebuje abakwirukira bose.

Utege amatwi, wumve isengesho ryanjye,

uhugukire ijwi ryanjye ndagutakambira.

*IVANJILI NTAGATIFU.*

*Amagambo yo mu Ivanjili Ntagatifu uko yanditswe na Mutagatifu Luka(Lk5, 27-32).*

Ibyo birangiye, Yezu arasohoka, yitegereza umusoresha witwa Levi wari wicaye mu biro bya gasutamo. Nuko aramubwira ati «Nkurikira.» Undi aherako ahaguruka, asiga byose, aramukurikira. Nuko Levi amujyana iwe, amukorera umunsi mukuru wo kumuzimanira. Kandi ku meza hamwe na bo, hari abasoresha n’abandi benshi basangiraga. Abafarizayi n’abigishamategeko babo bijujutira abigishwa be bababwira bati «Kuki murya kandi mukanywera hamwe n’abasoresha n’abanyabyaha?» Yezu aba ari we ubasubiza ati «Abazima si bo bakeneye umuvuzi, ahubwo ni abarwayi. Erega sinazanywe no guhamagara intungane, ahubwo nazanywe n’abanyabyaha, kugira ngo bisubireho. »

Iyo ni Ivanjili Ntagatifu.

***********************************

*INYIGISHO*

Yezu Kristu akuzwe!

Uyu munsi rero Yezu Kristu aje kuduhamagara, aho twibereye (niba navuga ntyo), mu byacu cyangwa se mu by’isi, kugira ngo tumukurikire mu nzira y’impuhwe, mu nzira yo guha abandi ubuzima, mu nzira y’ibyishimo, mu nzira yo gusabana n’abandi tutitaye ku bibi byabo, mu nzira y’urukundo rutagira uwo ruheza.

Yezu rero aje adusangana urukundo. Ntadusanga mu bibi byacu ngo “Heee, ngikiriya! Ese ubwo kiracyari muri ibyo? Ndakibona! Cyagiraga ngo sinzakibona rero! Wagiye kera k’ubusa! Uhagarare!” Amagambo nkayo ntabwo Yezu Kristu ayabwira umunyabyaha. Nta n’umwe muri twe Yezu Kristu acyurira ibyaha bye, ahubwo iyo amuciye urwaho, amucyura mu nzu y’impuhwe ze, akamubabarira.

Ibyo rero twebwe abantu, dukeneye kumwigiraho ku buryo bukomeye, nako si no kumwigiraho gusa ni ukumusaba ingabire yo kwakira abacumuye muri rusange, n’abaducumuraho muri rusange, kubarebana amaso nk’ayo yarebanye Matayo.

Yezu arasohoka yitegereza umusoresha. Yitegereza!  Umusoresha witwa Levi (ariwe ahandi bita Matayo)  wari wicaye mu biro bya gasutamo. Nuko aramubwira ati “Nkurikira”   Aramwitegereza! Amaso ya Yezu Kristu, indoro ya Yezu Kristu, ihura n’iya Matayo! Matayo ntiyari ayobewe ko ari mu byaha, kuko bariya bahoraga babicyurirwa n’Abayahudi, barabagize ibicibwa. Agiye kubona abona ubutungane ubwabwo burahingutse! Ubundi buriya  Matayo yagombaga kubigenza nk’umuntu (...) reka tuvuge nk’umumntu wakinguye akabari mu masaha yabujijwe, akabona nk’umupolisi cyangwa se umuyobozi arahise uburyo yabigenza, uburyo yakwitwara. Cyangwa se undi wese ufatiwe mu cyuho ukuntu yareba! Nk’uko bamwe bajya bavuga ngo ni ukureba nk’igisambo! Ariko cyane cyane ntabwo ari ukuntu yareba, ahubwo ukuntu yarebwa n’uwo muntu umubonye mu cyaha! Eee! Ni ukumureba ukundi nyine nk’aho ntacyo avuze, mbese amaso, indoro igukuba na zeru, ikwica uriho! Ni uko twebwe tumenyereye, twebwe abantu kureba abantu dufatiye mu cyaha. Nka mwarimu ubonye umunyeshuri ukopera uko amureba! cyangwa se undi wese ushinzwe kugenzura amakosa cyangwa se ibyaha, aguye hejuru y’umuntu nyine! Ese reka tuvuge nk’umugabo ufatiye undi ku mugore we, cyangwa umugore ufatiye undi ku mugabo we, uko yareba uwo muntu! Mutekereze ibyo ngibyo! Iyo ndoro mbi isenya umuntu ikamuhindura ubusa! Indoro yica! 

Uko rero si ko Yezu areba. Yezu Kristu yarebye Matayo. Iriya ndoro ya Yezu Kristu uko yarebye Matayo bigatuma amuhagurutsa aho yari yaricaye (niba navuga ntyo) imyaka n’imyaka cyangwa se aho yari kuzicara ubuziraherezo, muri uko gutandukana nyine n’inzira y’ubugingo, iributsa nk’ukuntu Yezu na none yarebye Petero nyuma yo kumwihakana gatatu! Indoro ya Yezu Kristu! Indoro ikiza! Indoro ihumuriza! indoro itanga ubuzima! indoro yuje urukundo!, indoro yuje impuhwe!  

Amurebye, yewe we! bakubitanye amaso, arebye mu maso ha Yezu Kristu, no muri iyo ndoro ye yuje urukundo, yibutse ukuntu yahemutse, yibutse na ya magambo, Petero ahita arira! Asohoka yirukanka arira! Urukundo rwa Yezu Kristu rushobora gucengera mu mutima w’ umuntu, nta n’ijambo  avuze, rikamwereka rwose ko ari rwose!

 Mu ndoro rero ya Yezu Kristu urukundo ruruzuye. Burya rero igihe cyose, Yezu Kristu aturebana impuhwe, uko twaba dusa kose, icyo twaba twakoze cyose. Atureshya: “Mwana wange ntabwo ngewe nakwishe, ntabwo nagukuye mu bo nacunguye. Nyegera wakire impuhwe zanjye. Ngwino”.  Yezu Kristu arareshya. N’ubu rero arimo aratambuka areshya ahamagara. Ahamagara kandi abantu nabo bazahamagara abandi, nka Levi uko byagenze. 

Umunyarwanda nawe yaciye umugani ati ”Ijisho riguha umusango nturiyoberwa” Yezu rero ijisho rye abantu arebye, ribereka umusango. Ati “Urakaza neza urisanga! Rwose ngwino muri nge nta rwango na mba rurimo, nta rwango ngufitiye. Ni urukundo gusa.  Ni impuhwe nsa. N’ubwo wancumuyeho bitavugwa, sinshobora kureka kugukunda. Ngwino. Ngwino nyegera nguhe umugisha, Nguhe ubuzima”

Iyo ndoro ya Yezu Kristu aho ari mu Ukaristiya, iyo ndoro ya Yezu Kristu, aho ari mu ntebe ya penetensiya! Indoro ya Yezu Kristu mu ijambo rye ryose riduhumuriza! Indoro ya Yezu Kristu muri uriya uje kutugirira neza, uje kutwinginga ngo tugaruke, tugaruke mu masakramentu twasohotsemo kubera ingeso mbi zacu, kubera se uburangare bwacu.  Bariya bose batugendereye kubera urukundo rwa Yezu, ibyo byose ni indoro ya Yezu. Kureba ijisho rwose ubwaryo rikinjira mu muntu, agasa n’ufashwe n’amashanyarazi y’urukundo! Akumva nta handi yagana handi usibye kugana kuri uwo muntu urimo amurebana urukundo! Ng’uko uko Yezu yarebye Matayo. N’uyu munsi ni ko natwe atureba rero.

Muvandimwe wikwiheba ibyo wakoze byose, aho waba wicaye ubu ngubu hose, muri ibyo wibereyemo, byaba ibyo uzi wowe ubwawe utatinyuka no kugira uwo ubwira kubera ko ari amahano arenze, ndetse ntiwabona n’amagambo yo kubivuga, bimwe nta magambo bigira. Hari ibintu dukora bimwe bitagira imvugo! Kubera ko abantu batabivuga ariko bigakorwa, ku buryo rero kugira ngo uze ubibwire umuntu uti “Ibyo bintu nabikoze” ubivuga muri ayo magambo, nta magambo ahari yo kubivuga, ariko ibyo byose ni ubusa imbere y’impuhwe za Yezu Kristu.

Yezu rero akurebana impuhwe none, nk’uko yarebye Matayo. Rwose mwemerere. Emerera Yezu. Emerera Yezu Kristu. Haguruka umusange. Ejo uzajye kwaka penetensiya. Haguruka usange Yezu Kristu. Ejo uzajye kwaka amasakaramentu wari warihagarikiye. Haguruka usange Yezu  Kristu. Ejo uzajye kwaka batisimu y’umwana wawe wari warangiye kubatirisha, haguruka usange Yezu. Ejo uzajye kugura bibiliya niba ntayo wagiraga mu rugo iwawe utari utunze ijambo rya Yezu Kristu, cyangwa se niba wari uyifite tangira uyisome, Yezu Kristu akuganirize, tangira ukunde kwigishwa. Haguruka usange Yezu Kristu. Haguruka ukurikire Yezu Kristu.

“Nuko aramukurikira.” Matayo asanga urwo rukundo atigeze abona ahandi ntaho ashobora kuruhungira! Abanyarwanda bo barise ngo Ntawuruhunga bavuga urupfu, ariko urukundo rwa Yezu Kristu muby’ukuri ni rwo Ntawuruhunga, Yezu Kristu urukundo nyine rugufata rukakwaka, rukakwereka ko ibindi byose wari urimo ari amanjwe! ko ibindi byose nta gaciro bifite, ko gukundwa na Yezu Kristu biruta byose!

Matayo ni uko byamugendekeye rero. Ese wabaye Matayo nawe? Wabaye Levi na we uyu munsi ra! Maze ugahaguruka mu bintu byaguteshaga igihe, ibyo witaga amaraha, aho ngaho wari wicaye ugahaguruka ukurikira Yezu? Yezu aravuga ati “Nkurikira. Nkurikira. Nkurikira!” 

Amateka rero yacu yo guhura na Yezu Kristu, Yezu agira aho adusanga nyine, akaduhagurutsa, akatuzura. Matayo we yari yicaye, ariko hari abandi noneho barambaraye! Ariko abo bose ukuboko kwa Yezu Kristu kuje imbaraga  kurabahagurutsa. Haguruka uve mu bapfuye Kristu kukumurikire. Yezu muzima Ibyishimo byacu, Inzira Ukuri n’Ubugingo. 

Iyo umuntu rero ahagurutse aho hantu, aba aruhutse. Yooo, kuva mu mumuvumo? Yooo! Burya iyo umuntu nyine yaheze  mu cyaha aba ameze nk’umuntu waciriwe urwo gupfa mu manza z’abantu, mu bihugu bikibaho! Bakabimubwira! Ahantu aba yicaye aho ngaho, ntawushobora kuvuga ngo biravaho, amategeko yabivuze! n’impuhwe z’umukuru w’igihugu wenda ntazihari muri icyo gihe! cyangwa se yanze kuzitanga, ubwo nyine bati “Arategereje!”

Muby’ukuri Yezu Kristu hari igihe adusanga ahantu hameze nka gutyo. Ibyaha byawe byaraguciriye urwo gupfa, n’abantu bose baraguciriye urwo gupfa, bati “Uriya we nimumureke apfe nta kundi dore ni we wizize”! Agahinda gahora kaguhekenya, warashatse kwiyahura n’urupfu narwo rurakwanga, maze umunsi umwe ukaba wakwigishwa ukabwirwa ijambo rya Yezu Kristu, ukumva ko urukundo rwa Yezu Krstu rutigeze rukureka, ko Yezu Kristu atigeze areka kugukunda! Yooo!  Ukaruhuka ukumva ko urwo rupfu rutakigupfumbase, cyangwa se rutakikwishe, ko Yezu Kristu agufashe akaboko. Yezu Kristu wapfuye akazuka, ko aguhagurukije ko akuzuye, agukuye mu irimbi ry’abapfuye, aguhagurukije atangiye kuguha kubaho! Yeee, umunsi mukuru rero uratangira nko kwa Levi rwose!

Buriya rero, abantu bafite amafaranga ni na bo baba gito muri rusange. Buriya birashoboka ko Matayo cyangwa se uriya Levi, nta bantu bandi yari yarigeze atumira ngo agire icyo abaha! kubera gushaka kuyarunda kuyarunda kuyarunda, ariko uwo munsi urukundo rwa Yezu Kristu rumaze kumwereka ko bya bintu yarunze ari ubusa, byose arundura, ati “Muze twishimane nabonye ibyishimo nyabyo aho biri ni Yezu Kristu! Muze dusangire na We twishimane na We!” 

Abantu rero bahuye na Yezu Kristu, kimwe mu bimenyetso simusiga  biranga ko muntu koko yahuye na Yezu Kristu, ni ibyo byishimo byo kubana na We no kubana n’abandi bantu bose. Byo gusangira n’abandi bantu! Gusangira n’abandi bantu ibyishimo, ariko cyane cyane ibyishimo byo gusangira Yezu n’abandi bantu. Gusangira Ukaristiya, gusangira Ijambo rye,  gusangira isengesho. Ibyo byishimo by’abavandimwe bahuriye  muri Yezu bahujwe n’izina rya Yezu.  Ngibyo ibyabaye kuri Matayo rero.

Kubw’amasengesho y’Umubyeyi Bikira Mariya n’Abatagatifu twibuka none, Yezu Kristu  ni yigarurire imitima ya bose. Nakore kuri bose uyu munsi abahagurutse, maze twese twishimire ko turi abe, kandi natwe tujye guhagurutsa abandi, tujye kubabwira ko Yezu Kristu wapfuye akazuka  ari Byose mu buzima bwacu n’ubwa byose.

Singizwa Yezu Kristu wadupfiriye ukazuka!

Ngwino Roho Mutagatifu, uduhe imbaraga zo guhamya Yezu Kristu. 

Mubyeyi Bikira Mariya, udusabire. 

Mutima utagira inenge wa Bikira Mariya uturengere.

 

Singizwa Yezu Kristu wadupfiriye ukazuka!

Padri Jérémie Habyarimana

Coslada, Madrid.